SAWANA'E HAZRAT UMAR FAROOQ RADI ALLAHO ALH

HAZRAT UMAR Hazrate Umar ibn Khattab radiallahu ta’ala anhu : *********** Laqab : Farooqe aazam *********** Aap ki wiladat 586 A.D. me Makka me hui. Walid ka naam Khattab ibn Nufayl aur Walida ka naam Hantamah binti Hisham ibn al-Mugheerah hai. Aap Quraish ke Banu Adi kabile se ta’alluk rakhte hain. *********** Elane nubuwwat ke kuchh waqt baad Rasoolallah sallallahu alaihi wasallam ke hukm se muslamano ke ek giroh ne Abyssinia hijarat ki. Hazrat Umar ko jab ye pata chala to Quraish me ikhtelaf na ho iske liye aapko qatl karne ka irada kiya. Jab talwar lekar chale to raste me aap ke dost Nuaim mile, jis ne islam apna liya tha lekin zaahir nahi kiya tha. Us ne kaha ke ‘Pehle jaakar apne ghar me apni behan ki khabar lo.’ Ye sunkar Hazrat Umar apni behan ke ghar pahunche to dekha ke unki behan aur behnoi Saeed bin Zaid Tilawate Qur’an (Surah Taha) kar rahe hain. Aap ne gusse me apni behan ko dhakka dekar girakar jakhmi kar diya to unki behan boli ke ‘Agar hamari jaan bhi chali jaae to bhi ham islam nahi chhodenge.’ Ye sunkar aap ne wo kagaz uthaya jis me Qur’an ki aayate likhi thi. Padhte hi dil ka aalam badal gaya. Aap talwar ke saath Rasoolallah sallallahu alaihi wasallam ki baargah me pahunche aur talwar rakhkar kalma padh liya. Aur is ke baad jaakar Quraish ke sardar Amr ibn Hishām aur Abu Sufyan ibn Harb ko apne musalman hone ki khabar de di. Is tarah aap 616 A.D. me 30 baras ki umr me islam dakhil hue. *********** Islam apnane ke baad kuchh waqt baad aapne Huzoor sallallahu alaihi wasallam se puchha ke ‘Ya Rasoolallah sallallahu alaihi wasallam, Kya ham ibadate ilahi karke kuchh galat kar rahe hain?’ Aap ne farmaya ke ‘Bilkul nahi.’ Hazrat Umar ne farmaya ‘To phir aaj ham bagair kisi ke khauf ke khule aam ALLAH ki ibadat karenge.’ Phir aap ne kuchh musalmano ke saath Ka’aba shareef ke paas jaakar kaafiro se kaha ‘Agar kisi ko apne bacho ko yateem aur apni biwiyo ko bewa karna ho to wo musalmano ko ALLAH ki ibadat karne se roke. Is tarah aap ne pehli baar khule aam namaz padhna shuru karaya. *********** 622 A.D. me Huzoor sallallahu alaihi wasallam ke Madina aane ke baad aap bhi Makka se Hijrat karke madina aa gae. Aap ne din ke waqt be-khauf apne chachazad bhai Saeed ibn Zaid ke saath hijrat ki. *********** Aap ishqe rasool ke saath har sunnato hadees par amal karte the aur Har waqt aap ki ta’azeem karte the aur dushmane rasool se kabhi rishta nahi rakhte the. Ek baar Rasoolallah sallallahu alaihi wasallam ki baargah me ek muslaman aur ek yahudi aaye aur apna jaghda bataya. Musalman ne is yahudi se zameen kharidi thi aur us me ek kuan tha. Dono ke darmiyan ye tay hua tha ke ek din yahudi uska pani istemal karega aur ek musalman istemal karega. Ek baar yahudi ki bari me musalman ne paani nikal liya. Is baat ko lekar dono me jhagda hua. Jab kisi tarah is ka hal na nikla to yahudi ne kaha ke ‘Aao, ham tumhare Nabi ke paas chalte hain aur un se iska faisla karate hain.’ Muslaman ne ye sochkar khush tha ke ‘Main muslaman hu, Is liye Huzoor sallallahu alaihi wasallam mere haq me hi faisla sunaenge.’ Huzoor sallallahu alaihi wasallam ne dono ki baat sunne ke baad yahudi ke haq me faisla diya. Musalman ne socha ke kisi bhi wajah se Rasoolallah sallallahu alaihi wasallam ne yahudi ke haq me faisla de diya hoga. Wo Hazrate Abu bakr Siddiq ke paas aaya aur sari baat batai aur faisla karne ke liye kaha. Hazrate Abu bakr ne keh diya ke ‘Huzoor sallallahu alaihi wasallam ne jo faisla bata diya hai, use koi badal nahi sakta.’ Phir wo Hazrate Umar Farooq ke paas aaya aur sari baat batai. Aap foran andar jaakar talwar lekar aaye aur muslaman ki gardan kaat di. Musalmano me kohram ho gaya ke Hazrate Umar ne musalman ko maar dala. Huzoor sallallahu alaihi wasallam ne aap ko bulakar haqeeqat puchhi to aap ne kaha ke ‘Jo aap ke faisle ke khilaf ho aur aapki baat na maane wo musalman ho hi nahi sakta. Wo islam ki aur be- izzati kare is se pehle maine uski gardan kaat di.’ *********** Ek baar aap ne Ka’abatullah ke Tawaf ke dauran Hajre Aswad se mukhatib hokar farmaya tha ke ‘Aye Hajre Aswad, Tu jannati patthar hai, Lekin mujhe na koi nuqsan pahuncha sakta hai, na koi nafa de sakta hai. Main sirf is liye tujhe chumta hu ke maine mere Aaqa Rasoolallah sallallahu alaihi wasallam ko tujhe chumte hue dekha hai.’ *********** Huzoor sallallahu alaihi wasallam ne farmaya hai ke ‘Mere baad agar koi Nabi hota to woh Umar Umar ibn Khattab hota.’ Aap ashra e mubashira me samil hain. Aap ka laqab ‘Farooq’ hai ya’ni Haq aur Batil me farq batane wala (Farooqe aazam ya’ni tamam Farooq me sab se bada). Aap ki Adalat mashhoor hai. Aap bahut ache Muqarir (Khateeb) the. ********** Aap ki beti Hafsa Huzoor sallallahu alaihi wasallam ke Nikah me aai hai. ********** Aap ke mashware par Hazrate Abu bakr Siddiq ke zamane me Qur’an majeed ko jama karke kitaab banana ka kaam shuru kiya gaya, jo Hazrat Usman Ghani ke zamane me mukammal hua. ********** Hazrate Abu bakr Siddiq ne Hazrat Usman Ghani ko Hazrat Umar Farooq ko Khalifa banana ki wasiyat ki thi. 13 Hijri me Aap Hazrate Abu bakr Siddiq radiallahu ta’ala anhu ke baad dusre Khalifa hue. Aap ke zamane me Islami saltanat Fars (Iran) aur Misr (Egypt) aur Rom tak faili. ********** Aap ke zamane me Mahe Ramzan me Tarawih ki namaz ba-jama’at padhana shuru hua. Aur is ke baare me aap ne farmaya ke ‘Ye ek achhi bid’at hai.’ ********** Aap ne har sube me ek Wali (Provincial governor) aur unke taabe Wali e asgar (Junior governor) muqarrar kiya. Ilawa iske Katib (Chief Secretary), Katib-ud-Diwan (Military Secretary), Sahib-ul-Kharaj (Revenue Collector), Sahib-ul- Ahdath , (Police chief), Sahib-Bait- ul-M aal (Treasury Officer) aur Qazi (Chief Judge) bhi muqarrar kiye. ********** Aap hamesha musalmano ki khush-haali aur falah ke liye aur unki pareshaniyo ko door karne ki koshish karte. Aap kai baar raat me khufiya (libas badalkar) apni riyaha ke haalat jaanne ke liye nikalte. Ek baar aap ek makaan ke paas se guzre. Aap ne bacho ke rone ki aawaz suni. Aap ne dastak di to ek aurat ne darwaza khola. Aap ne bacho ke rone ki wajah puchhi. To us aurat ne bataya ke ‘Mere bache bhuke hain aur mere paas unhe khilane ke liye koi chiz nahi. Mere bahut der se paani se bhara hua bartan aag par rakhkar unhe behla rahi hu ke jab khana tayyar ho jaaega to khilaungi. Ab to bache thakkar so gae hain.’ Aap ne kaha ke ‘Main kuchh intazam karta hu.’ Aap ne baitul maal me se khane ka saaman nikala aur us aurat ko laakar diya. Us aurat ne dua dete hue kaha ke ‘Kaash, Aap Ameerul mo’mineen hote.’ Aap ne apna chehra kholkar use farmaya ke ‘Main hi Umar ibn Khattab hu. Mujhe muaf kar dena ke meri hukoomat me tumhe is tarah taklif bardasht karni padi.’ ********** Aap ki 9 biwiya aur 9 bete aur 4 betiya hue. (1) Zainab bint Mazhun se 3 bete : Abdulallah, Abdur Rahman, Abdur Rahman, 1 beti : Hafsa (2) Umm Kulsum bint Jarwila Khuzima se 2 bete : Ubaidullah, Zaid (3) Quraybah bint Abi Umayyah al- Makhzumi (4) Umm Hakim bint al-Haris ibn Hisham se 1 beti : Fatima (5) Jamilah bint Ashim ibn Sabit se 1 beta : Asim (6) Atikah bint Zaid ibn Amr se 1 beta : Iyaad (7) Umm Kulthum bint Ali ibn Abi Talib se 1 beta : Zaid (Ibnul Khalifatain) 1 beti : Ruqayyah (8) Luhyah 1 beta : Abdur Rahman (9) Fukayhah 1 beti : Zainab ********** 23 Hijri (644 A.D.) me Firoz (Abu Lulu) ne apne maalik Mughira ibn Shu’ba (jo Basra ke Subedaar (governor) the) ke khilaf bahut zyada mehsool wasool karne ke baare me Hazrate Umar se shikayat ki thi. Magar aap ne tehqeeqat karne ke baad use ye keh diya tha ke ‘Ye mehsool barabar hai.’ Is baat se gussa hokar usne Hormuzan, Ka’ab al-Ahbar aur Jafinah ke saath milkar aap ko qatl karne ki saazish banai. 22 Zil-Hijja ke din Fajr ki namaz ke waqt Hazrate Umar jab masjid me the tab Abu Luhu ne khanjar se hamla kiya aur aap ke pet me 6 waar karke jakhmi kar diya aur aapke badan se tez raftaar se khoon nikalna jaari ho gaya. Abu Luhu ne bhagne ki koshish ki, Lekin ashaba ne use nakaam kar diya. Bhagne ki koshish me usne 12 ashaba ko jakhmi kar diya aur phir khud ko khanjar marke khudkushi kar li. Aap ne 4 din jakhmo se bahut taklif me bistar me guzare. Is dauran aap ne Abdur Rahman bin Awf, Saad ibn Abi Waqqas, Talha ibn Ubaidullah, Usman ibn Affan, Ali ibn Abi Talib aur Zubair ibn al-Awwam ki committee banakar unhe naya Khalifa mukarrar karne zimmedari de di. Aur is dauran Suhayb ar-Rumi ko aarzi khalifa banaya gaya. Aap 26 Zil-Hijja, 23 Hijri (644 A.D.) ko 58 baras ki umr me shaheed hue. Aap ko Huzoor sallallahu alaihi wasallam ke Roza Mubarak ke andar Hazrate Abu bakr Siddiq ke bagal me dafn kiya gaya hai. *********** ALLAH ta’ala uske Habeeb sallallahu alaihi wasallam ke sadqe me aur Hazrate Umar Farooq radiallah ta’ala anhu aur Ashaba ke waseele se Sab ko mukammal ishqe rasool ata farmae aur Sab ke Iman ki hifazat farmae aur Sab ko nek amal karne ki taufiq ata farmae aur Sab ko dunya wa aakhirat me kamyabi ata farmae aur Sab ki nek jaiz murado ko puri farmae. Aameen.